「0+3」增加咗幾多旅客應該點計？

香港政府喺9月23號宣佈放寬入境檢疫要求，由原本「3+4」改為「0+3」，即係唔需要強制檢疫住隔離酒店（原本要3日），只需要頭3日醫學監察，期間可以有限制下自由活動（疫苗通行證變黃碼），之後4日自行監察。

尋日《香港電台》報導指「0+3實施首周機場入境人次略增」，以「0+3」落實第一星期經機場入境嘅旅客人次（平均每日5612人次）同對上一星期人次（平均每日4780人次）比較，發現增加約17.4%。

記者陳珏明就提出「除非原來機場入境人次是以每星期為一個循環周期，否則未見有特別意義」，又反問「既然是取平均人次，是否選取愈長日子的平均人次數，更可以反映政策前的入境情況？」而佢以8月12日（檢疫要求放寬要「3+4」第一日）開始計到9月25日（「0+3」落實前一日），得出平均每日經機場入境旅客人次係5528，所以認為只係增加1.52%。

用唔同數據呈現當然可以得到唔同結論，但點先算合理其實有得講下。我自己就無特別跟開入境數字，所以去搵返入境處數據嚟睇下，由2021年1月1日去到2022年10月3日。

首先，機場入境人次應唔應該用一個星期去睇？港台個計法係咪「未見有特別意義」？睇到呢句我都覺得奇怪，印象中以往星期日多啲人返嚟，事關好多人都係返星期一至五。但既然有數據就唔使做印象派，我計咗由2021年頭到尋日，同埋由今年8月12到9月25（「3+4」落實期間）星期一至星期日嘅平均人次︰

好明顯星期日的確係最多人返，而且比最少嘅星期一分別高出57.3%同45.6%，亦比第二多嘅星期五高出23.1%同14.8%。要話用一星期計數「未見有特別意義」，恐怕需要更多理據。

而且陳珏明計8月12到9月25日之間嘅每日平均，其實係由星期五計到星期日，即係多咗個比較多人嘅星期日（雖然都有個較少人嘅星期六），咁比較都唔係幾適合。

如果用一星期去比較，我哋都可以睇下「0+3」落實第一星期，同對上幾個星期嘅數字差別︰

呢度可以見到入境人數由8月中到9月下旬其實係跌緊，所以「0+3」之後個回升都幾明顯，當然淨係同上一星期比較就多咗成五千幾人，如果係同早兩三個星期比較，就只係多三千人左右，而同8月尾9月頭個星期比較就無乜乜分別，同8月中至8月尾比較，就仲爭三千幾人。陳珏明計到嘅1.52％，明顯係俾較早時段嘅數字拉低咗。

呢度可以睇到，計平均人次嘅時候，的確唔係攞得越多日子越巴閉／準確，其中一個原因係入境政策只係其中一個影響因素（即使好重要），例如可能有唔少人係暑假尾返香港，8月底數字會較高？（不過今年暑假短咗，我都唔肯定，純粹想講有其他因素。）

當然，我都同意而家得一個星期數據，要睇耐啲先判斷到「0+3」係咪真係令到多咗人嚟香港，例如可能有啲人等咗好耐見「0+3」就即刻返嚟先，亦都可能係落實頭幾日想返嘅人都未買得切機票。但以目前數據去睇，「0+3」落實後的確多咗人返嚟，咁所謂「從數字可見，如此說法未見有明顯的數據支持」先至係同數據不符。

另一個我覺得值得睇嘅數字係「其他訪客」人次，《港台》報導提到啱啱個星期日係「0+3」落實後最多機場入境旅客嘅一日，當中「其他訪客」有732人次係過去兩星期最多——其實係2021年頭以嚟最多。9月29號到10月3日嘅「其他訪客」人次分別係550、645、572、732、722，而2021年1月1日到今年9月28號無一日多有550人次。

呢樣就留畀有興趣睇出入境數字嘅人研究了。

同上面完全無關係，不過寫開就順便講埋，年頭講過陳珏明質疑袁國勇嗰陣打咗稻草人（梁啟智都有份但似係俾《獨媒》誤導，同埋有更新帖文），篇文同時提到佢講疫苗數據時有問題︰

陳珏明在文中一再質疑某些數據能否推論出因果關係，最後一段卻犯下同樣錯誤，包括提及「海外數據亦證實，不論是那一個生產商的疫苗，均曾錄得注射後死亡個案」和「最少在香港現時亦錄得逾5000宗接種疫苗後異常事件的報告」。這兩句說話事實上並沒有錯，然而單純如此寫出來就可能誤導讀者，疫苗接種計劃開始至今都接近一年了，這種寫法實在不應繼續出現。

而佢最近批評政務司司長陳國基嘅文章入面，仍然可以見到類似寫法（見下圖第3點，貼全文純粹想講無斷章取義）︰

事實上，數字顯示，受感染而死亡的個案中，仍有三成人是已有接種疫苗，一成五死者是接種了兩針或以上，當中2.5%人士更是接種了三針或以上的疫苗劑數；

希望大家可以睇下梁啟智喺《端傳媒》嗰篇〈傳媒誤讀數據 — — 認識疫情數據的常見誤區〉（要訂閱，唔知仲有幾多個免費名額）。

（原刊於Medium）