《誤人子弟》與體藝

年初葉偉信有個人電影回顧展，上返喺體藝拍嘅《誤人子弟》。早前喺Threads寫下電影一啲場景順手寫少少體藝，執少少再抄返過嚟。

1. 校門三腳雕塑

雖然門口黐咗校名「日山中學」，但林Sir（林海峰）帶Miss Lee（徐子淇）周圍行嗰陣，喺禮堂仲見到體藝嘅校訓「體仁藝智」、平台亦影到大大個校徽（另外兩場教員室啲簿同Office有件衛衣都有，衛衣遲啲開多個post講先cap圖）。

電影影唔晒門口個三腳雕塑，不過可以見到當年只係擺啲盤栽圍住，後尾先變成個花圃（我讀緊嗰陣轉，但唔記得咗邊年）。

2. 時光隧道

體藝一入校門有條有蓋隧道直接去到樓梯同有蓋操場個位，體藝人會叫做「時光隧道」，其實唔知點解，但個名就係咁流傳落嚟。

喺《誤人子弟》可以睇到，1997年嘅時光隧道以至欄杆、房門、二三樓通往禮堂、（舊）圖書館嘅通道都係油上各種紅色（睇圖，自然要cap埋「入天文學會，你唔會後悔」呢幕）。

直接大約2003至2004年期間，校園先重新油過晒變成藍色為主色，直到而家。當年接任創校校長嘅第二任校長離任，呢位校長個名有個「虹」字，有個花名叫「Red Chan」仲有同學整網站笑佢（好似最後都捉唔到邊個，我都唔清楚），所以就有個講法話係佢走所以要轉走晒啲紅色（應該唔係好多人信但係幾好笑）。

創校校長就出名幾自由，我入學時係佢離開第一年，無親身經歷過，好多都係從老師、師兄師姐甚至校工度聽返嚟嘅傳聞。

讀七年間體藝紅色變藍色、經歷三任校長，都算係幾大轉變嘅時期，嗰陣都幾覺得體藝越嚟越唔掂。而家我就無感覺好耐了，只係諗返讀書嗰陣真係好開心。

3. 展覽廳變會議室

戲入面呢個「校務會議室」實際上係體藝嘅 gallery，所以後面會有咁多畫。但啲畫唔係好似體藝嘅人畫，唔知係年代唔同定當時展緊其他嘢（斷估後者，有張畫左半董建華右半沈殿霞，唔知做乜）。

Gallery 喺地下，但要行上半層先去到（見林海峰同徐子淇張圖右邊條樓梯），一開場嘅校務處同校長室都係呢個位。至於高空影落去嗰幕就喺一樓影。

我中七嗰年曾經同幾個都係讀 A-Level Visual Arts 嘅同學借過 gallery 一排，當係自己 studio 咁用，其實都唔知點解可以咁樣幾條友霸咗個 gallery，但我記得係老師同我講OK。總之嗰排 lunch time、空堂都會去hea下（美其名為做work），我中學生涯僅有兩次遲到其中一次就係 lunch time 留咗喺 gallery，之後空堂唔記得去點名。

後尾要交返 gallery 出嚟嗰陣，我記得因為隻玻璃門黐過嘢有膠紙痕要清理，清緊嘅時候有位讀 Chem 嘅同學叫我用酒清抹，話會溶到啲膠，而家我買完二手書都係咁清啲價錢牌嘅膠痕，呢個建議真係一生受用。

4. 男廁變女更衣室

《誤人子弟》入面有一幕係林sir（林海峰）喺校園周圍行時，唔小心入錯更衣室撞正女同學換衫，呢場應該睇過都會有印象，但我睇嗰陣就硬係覺得唔對路。

主要原因係，呢個位明明就係男廁，睇住佢入到去變更衣室會覺得好奇怪。而且泳池都有個更衣室，唔需要換完行咁大段路。當然呢個位係熟間學校先會覺得唔妥，唔係製作問題。

到電影後段，幾個老師喺禮堂等緊同學去天文學會活動時，林sir話要去洗手間，我之前凝住係拍禮堂嗰個廁所，但其實影到門外睇得出係地下男廁。（見下面第6張圖。）

Anyway 劇情上呢場幾奇怪，後尾講到個學生鍾意林sir，又無咩理由係因為睇到佢換衫啫，但佢第一次出現就係呢場。傾向覺得只係滿足直男幻想。

Btw 有另一場戲話啲老師知道Miss Lee（徐子淇）會游早水之後，第二朝一個二個都去咗泳池，嗰度就明顯唔係體藝，對返片尾應該係黃埔嘅博藝會。

5. 飯堂

早幾日唔得閒，繼續講下《誤人子弟》嘅體藝，今次講食飯。入面有場戲係 Miss Lee（徐子淇）一話不如食飯，班男老師就和應，去咗 canteen 食，開頭叫小菜，然後先知得碟頭飯（因為班老師一向無去食唔知）。

當年我就通常唔留學校食，多數都係出去。早期去最近學校嘅村屋食平價碟頭飯——唔健康嘅豬扒／雞扒／火腿／腸仔／煎蛋（雙併）飯，$19連杯可樂——之後都係火炭大牌檔多。除此以外，都有去禾輋（街市平價燒味飯飯盒、大牌檔）、上駿景園個商場（好似係得麥當勞）、沙田商業中心（aka玻璃屋，火炭大牌檔再上少少）甚至過沙田新城市食。

至於 canteen 雖然平（印象中質素一般），但一遲就多人，而且有一部分位留咗畀宿生（宿費包埋飯），就係戲中啲老師坐嗰頭，自然更少位坐，就懶得爭位。

有位好友嗰陣都有住宿，佢不時都會賣返碟飯畀人然後一齊出去食。反而中六打後因為有空堂，間中都會落下 canteen 過，撞啱時間就可以搶先買飯而有食下。嗰陣無聊得濟會畫下牆嘅裂痕同枱嘅𠝹刀痕（上中大之後都喺錢lib二樓室外空間啲枱畫膠紙痕）。

（另外想講套戲入面林sir話得雞飯，但之後影到個個碟飯都唔同。）

6. 圖書館

《誤人子弟》後段劇情講到林sir（林海峰）中咗大獎，有得喺超市一分鐘免費任攞，班老師就幫佢喺圖書館度練習。拍攝地點自然係體藝當時嘅圖書館。

圖書館我唔算留得多，但對個「靜」字都有印象，同埋其實入面樓底好高，有多一層（低炒個鐘頭影到），記得上過去但唔記得做乜。我都係睇戲先發現原來啲書櫃有木條釘住。

電影一開始喺教員室有老師唔見咗銀雞，之後有人提議鑽開個櫃桶，有人就話學校整爛嘢要賠，跟手林Sir就問另一個老師圖書館推冧書架賠幾多（尾三張圖）。

話說喺我嗰個年代，真係有同學玩玩下推冧咗書架，聽講仲係骨牌咁冧咗幾個，整親圖書館個老師，好似休養咗陣。但由於無親眼見到，所以唔知事件詳情同有幾嚴重。

當時圖書館喺三樓，尾二張圖兩條天橋駁過去，下面二樓係去禮堂，上面就去舊圖書館。後尾起咗新翼，圖書館搬咗過去（好似係一樓），啱啱望體藝個網站先發現2020年又搬咗去舊DT房（畢竟連DT呢科都無埋）位置，即最尾張圖左面。

7. 火炭火車站

電影尾聲Miss Lee要走，林sir參加天文學會望落去見到佢離開緊學校，就衝去火炭火車站，結果見班車開走咗，又走返去火車經過嘅位揮手結果Miss Lee睇到，搭返返去講byebye。

首先，林sir跑去火車站經過嗰條橋雖然油咗紅色，但唔關體藝事，呢條橋穿過大埔公路去體育學院，唔係去體藝（順帶一提，體院同體藝兩間嘢無關係的，以前成日有人誤會）。

之後林sir就跑到去A出口落咗月台，咁啱火車開走（仲係舊式黃頭），再跑返上去，今次林sir就兜B出口跑過另一條橋過返城門河，而揮手個位係行去禾輋方向嘅一段路——但其實佢經A出口去快啲，唔使兜嚟兜去。而且數都唔使計，林sir就算跑去A出口都無可能跑得咁快，真係要講得通嘅話，應該係Miss Lee上咗下一班車。

揮完手林sir唔知點解又行去條橋度，無返學校，但咁先有戲做可以見返Miss Lee啩。

Btw 由於火炭去禾輋呢條路行足七年（之後讀中大行多三年），所以《幻愛》有一幕其實係火炭行去禾輋中間條隧道，我睇嗰陣一眼就認得出。

8. 英語教學

《誤人子弟》一開場講林sir見工，提出自己可以教英文，校長（盧雄飾）話英文佢自己教。跟住有人敲門，一出去有個外國人一輪嘴咁講英文，林sir同校長兩個都聽唔明，校長鳩up耍走對方。

戲入面只係個細嘅笑位，但體藝同英文又真係有故仔講。

電影1997年上映，當年香港政府要求下個學年起公營中學用中文授課，之後讓步畀學校申請用英文教，開頭124間學校申請100間成功，有14間上訴得直，體藝就係其中一間（數字抄維基百科）。

體藝100%自行收生，聽講當年申請失敗時收生情況慘淡，要上訴得直先多返人報名。唔知係咪因為咁（轉校長都可能有關）體藝似乎變得更強調成績，甚至英文。

例如體藝校歌以往得普通話歌詞，但2003年轉新校長之後，個校長有次早會話佢有朋友問點解EMI中學校歌唔係英文（又唔問點解唔係廣東話），然後搞咗英文填詞比賽，後尾校歌加埋英文版（即係唱兩次）。

到咗2010年另一個新校長上場（無記錯嘅話中間換過兩個），體藝仲整咗個 “English First and Last Cantonese Only if Needed” 活動叫人講英文，最慘係宣傳品核突，愧對體藝之名。

2024-07-04 更新︰發現2011年5月20日影過以下呢批相，加埋落去。

9. 衛衣

《誤人子弟》喺體藝拍攝，戲入面嘅「日山中學」連校服都完全唔同樣，僅有嘅體藝校服痕跡咁啱就係以前體藝校服最大特色——衛衣（圖右下）。

話說當年（2000年代初期）體藝校服都幾多花款，望落無咩特別但數落其實唔少組合。男仔白衫深藍褲（夏天可以著及膝短褲）、女仔白衫淺藍（夏）／深藍（冬）裙，夏季女仔裇衫有得揀公主袖，裙就冬夏季都有A字／百摺裙。

外套方面，冷衫長短袖、圓領V領、深藍色灰色都得，有傳統款校褸但少人著，多數人著坊間校服較少見嘅衛衣，就咁灰色過頭笠心口有個細校徽。

但點解張圖唔係咁？事緣衛衣仲有款連帽有拉鏈嘅隱藏版，本身去交流團嘅同學先有，後尾啲人見靚就自己出去訂造，仲老作交流地點，搞到好多人都有。（我個年代係咁，再之前真係唔知，歡迎補充。）

2005年左右，學校搵件新嘅灰色核突多功能外套做校褸，取消衛衣，只留低深藍V領冷衫。當年啲副校、訓導老師同我講要整齊所以統一著藍色，嗰陣我就指住行過嘅同學件新校褸問係咩色。

其實就係唔講道理。校服未必好重要，當年就係睇唔起嗰種唔知為乜要整齊統一嘅教育方針。（睇返相，件校褸好似再改咗款變深藍，冷衫就變鮮藍色有校徽，仲出咗件深藍色衛衣。）