因為言行就可以鬧人「黑鬼」？

馮睎乾今日篇文寫種族歧視，講明種族歧視係無稽之談，「永遠沒理由支持種族歧視」，但最後一段教人判斷種族主義言論就有啲奇怪︰

要判斷什麼是種族主義言論，其實不難，只須考慮那言論是否基於「種族」因素而發表就是。你罵譚德塞為「黑鬼」，是因為他的言行，而非他是黑人，自然就不算種族歧視。

《蘋果日報》仲要整埋圖︰

馮翁出發點係唔想見到「種族主義的本義勢必淹沒於泥漿之中，而正面的普世價值，也會慢慢淪為邪惡軸心的鬥爭工具」，我非常同意，但認為佢呢個例子一嚟錯，二嚟令到個判準變得好唯心，三嚟萬一變相鼓勵人用歧視字眼鬧人就唔好。

首先，如果你因為譚德塞言行而鬧佢做「黑鬼」，咁到底鬧咗乜言行？結果都係鬧佢黑，咁點樣唔係基於種族因素而發表？鬧佢「仆街」「賤人」呢啲字眼可能用得多會有啲空洞，但起碼都知道係講緊佢人格問題。（至於涉及生殖器官嘅粗口係咪父權，以粵語粗口嚟講，當中嘅性別差異太明顯了吧，但係咪女人／女性主義者唔講得？又唔係，只係個討論好似比較複雜，呢度唔太關事，就唔叉開話題。）再者呢類種族歧視字眼背後有其歷史背景，點解可以講點解唔應該講，唔係因為我覺得鬧緊佢其他嘢就得。

「黑鬼」個例子係說明「只須考慮那言論是否基於『種族』因素而發表」呢個標準，標準本身簡單易明，但一加埋個例子，睇落就變成「我唔係因為種族而鬧佢，就鬧佢乜都得」咁。問題係，判斷一個人嘅動機，往往都係靠外在言行去估，如果見到有人就咁鬧譚德塞一句「黑鬼」，我點知佢原來係鬧譚德塞一直幫住中國、排拒台灣，令到世衛反應慢、無速度、唔夠快呢？但如果佢會講清楚譚德塞做嘅錯事，咁句「黑鬼」其實又有咩關係呢？

馮翁指嘅「偽種族主義」，係明明做錯事又借種族主義嚟轉移視線，不過馮都提到種族主義者的確存在，即使有仆街用「俾人歧視」嚟做擋箭牌甚至屈人歧視，都唔能夠因此覺得歧視本身合理——馮翁當然唔會亦無意宣揚歧視，但本來有啲人本來已經歧視人，就可能借機宣揚歧視言論。當呢啲人用歧視字眼，又繼續會俾人用嚟轉移視線，落入「歧視loop loop loop」。

點解要用歧視轉移視線？因為有啲人真係俾人種族歧視開，當見到其他人都因為膚色受歧視，自然情感上相對認同（雖然可能只係未搞清楚對方做過乜），所以用歧視可以爭取到支持。如果你唔想譚德塞用種族歧視轉移視線，但又繼續鬧佢「黑鬼」，咁你估其他一直受種族歧視嘅人會唔會想撐你？

所以對住啲用歧視轉移視線嘅人，我覺得應該直接同佢講︰係呀歧視係錯呀，啲人唔應該咁鬧你（呢度假設真係有鬧，無嘅話就鬧埋佢屈人），但好多人都唔係鬧緊你呢樣，你回應返自己做錯乜先啦。

後記

馮翁兩日後更正（當日已經講咗會更正，但尋日應該要出篇呼籲大家訂《蘋果日報》嘅文，所以要等多日）︰

抱歉，「黑鬼」也是歧視語 - 馮睎乾 | 蘋果日報•聞庫

我在前日的〈生殖器官歧視罪〉說：「你罵譚德塞為『黑鬼』，是因為他的言行，而非他是黑人，自然就不算種族歧視。」文章刊出後，幾位朋友（包括真正的社會學者）告訴我這是錯的，並指出為什麼錯。我同意他們的批評，承認以上的話很不妥當，謹向讀者道歉。 也許我這樣說了，你仍覺得「黑鬼」不是種族歧視，只是普通蔑稱（蔑稱不必然涉及歧視），但正是這種主觀感受，令我輕率寫下那句有問題的話。我最大的疏忽，是沒考慮文中「黑鬼」是「negro」中譯，而「negro」在今天確實常被視為歧視語。 種族歧視有程度之別。對黑人冒犯最深的「The N-word」，並非「negro」，而是「nigger」（美國有人認為加引號寫此字也有問題）。至於「negro」，社會學者友人解釋：民權運動時期，馬丁路德金曾自稱「negro」，也提倡非裔美國人以此自稱，所以歷史上「negro」有過「black pride」意思，並非歧視語；但語言用法與時俱變，今天「negro」已帶貶義，雖沒有「The N-word」那麼強烈的歧視色彩，但依然冒犯黑人。問過幾位長居美國的朋友，都同意「negro」帶侮辱意味，甚至涉及歧視。 「The N-word」和「negro」是禁忌，因為字詞本身已承載昔日黑人長年被奴役、被歧視的血淚史，既然字眼喚起的是那段歷史，自然就是種族歧視語。以上說法該無異議，但中文「黑鬼」又如何？答案並非那麼明顯。或說「黑鬼」即「negro」、「The N-word」中譯，意義相當，恕我不敢苟同。「黑鬼」可作中譯用，但它本身並非譯語。中國以「黑鬼」稱黑人，明代已有，如王士性《廣志繹》卷四云：「番舶有一等人名崑崙奴者，俗稱黑鬼，滿身如漆，止餘兩眼白耳。」 「黑鬼」當然也是蔑稱，但跟「negro」屬兩條歷史脈絡，無需混為一談。不過既然容易混淆，我也建議盡量不用，免予人口實。全球化時代，語言的確多了忌諱，有位做國際新聞的朋友說「鬼佬」也「極不禮貌」，我的尺度則較寬鬆。無論如何，罵譚德塞有很多貼切字眼，不講「negro」，就可避免他趁機轉移視線。

聞庫蘋果日報

（原刊於Medium）