點解咁多人以為全民檢測「要插入半個頭」？

關於全民檢測要將拭子隊到幾入嘅問題（用「鼻咽」定「鼻腔」拭子），好多人誤傳係要插入半個頭，實際上唔使。

政府嘅添馬台話「網上流傳誤導資訊，意圖嚇怕市民而不去參與普及社區檢測計劃」，好似政府同警察之前講傳言咁都係從意圖角度入手，一定係別有用心，但唔諗下點解會咁多人傳（當然唔係話多人傳就啱，只係都要諗下點解）。

除咗話有人刻意（我唔肯定有幾刻意，就算係擺明反對做檢測嘅，可能本身都誤會咗係用鼻咽拭子）傳錯誤訊息之外，本身已經有三件事容易令人誤會係用「鼻咽拭子」︰

1. 8月頭（林鄭都未宣佈個計劃前）已經有做鼻咽拭子定深喉唾液嘅討論。例如8月6日港台報導︰「其中一間內地在港病毒檢測機構凱普表示，『內地核酸檢測支援隊』先遣隊，傾向使用鼻咽拭子測試，以便做「混合樣本檢測」，大量增加測試量。」（原文已刪除，但《Yahoo!新聞》仍有轉載記錄。）

2. 直到8月19號，即係聶德權公佈檢測細節前兩日，同政府開過會嘅西醫工會會長楊超發都話「每名市民需留下兩個樣本，除了咽喉樣本，仍然未肯定要留鼻咽抑或鼻腔樣本」（參考文匯報8月20日報導，內文講緊「昨日」所以係8月19日）。結合埋之前個討論，即係有成兩三個星期大家都估緊可能係用鼻咽拭子。

3. 就算政府公佈之後，都仲有媒體講緊「鼻咽拭子」，有啲係用嚟指「鼻腔拭子」，有啲就係結合咗「鼻腔+咽喉拭子」（但參考返衞生防護中心個指引，「鼻腔拭子」同「鼻咽拭子」係唔同定義，唔可以自已改名），詳情參考查核報告。

如果考慮埋呢三點（至少頭兩點），宣佈時強調下係「鼻腔」唔係「鼻咽」，或者已經可以及早澄清。

（原刊於Medium）