彭斯辯論表現勝賀錦麗？

睇到香城公民媒體個post，真係忍唔住想寫幾句。話說早前美國副總統候選人辯論，由共和黨嘅彭斯（Mike Pence）對民主黨賀錦麗（Kamala Harris），香城公民媒體星期四下畫出咗個post，話「香港多間傳媒都引用CNN的民調結果，表示賀錦麗取得壓倒性勝出」，但「記者發現這結果與當地多個電視台所作的民調不一」。

一睇啲圖大部分都係網上投票，除咗Fox News嗰個唔肯定（但斷估都係），咁我搵返CNN篇報導出嚟啦，人哋係搵咗間公司幫手做個隨機抽樣民調，同就咁整個網上投票係兩回事——網上投票先唔講重複投嘅問題，你連投票嘅係咪美國人都唔知，更加唔使講個樣本有無代表性（點做weighting呢）。另外，頭先上FiveThirtyEight亦見到有篇文講副總統候選人辯論，538同Ipsos做嘅調查顯示認為賀錦麗表現、政策好嘅比率都係高過彭斯。

當然你可以覺得彭斯表現比較好（利申無睇無意見），但用得「彭斯表現勝賀錦麗 CNN民調相反」咁嘅標題，原來證據只係網上投票，就真係搞笑咗少少囉。

後記

梁啟智 寫咗篇文講美國大選民調數據，當然深入好多（但唔深的唔使驚），有興趣可以睇下︰

美國大選選情之純數據討論

美國大選投票還有不到一個月截止（對，是截止，不是開始。投緊㗎喇，幾百萬人投咗票㗎喇），是時候對選情作最後推演。以下純數據討論，不過都預咗今時今日的香港，只要唔啱聽就會瞬間變成「假新聞」。點都好，我會詳細寫晒所有推論過程同數據來源出嚟，當立此存照啦。

Medium梁啟智

（原刊於Medium）