朱利亞尼的低級錯誤
當一個人喺公開場合犯下咁低級嘅錯誤，你應該衡量下佢其他講法有幾可信。
話說早前朱利亞尼聲稱 Pennsylvania 出現選舉舞弊嘅其中一項「證據」，係郵寄選票只寄出180萬，但點票時就有250萬票，《大紀元時報》都有引述。
如果呢個指控屬實就真係幾大問題，咁自然要去睇下佢講嘅說話有無根據，而唔係即刻就相信、唔加以查證就報導啦。
只要稍為 Google 一下，就可以發現投票日前大約一星期（10月28日）《美聯社》已經報咗有成300萬人申請郵寄投票。（所有資料來源見文末。）
而家有啲人一見主流傳媒就話係 fake news，咁梗係唔會信《美聯社》報導——雖然人哋都係引用官方數字——唔緊要，都應該再搵多啲資料。
當時喺 Google 未見到 Pennsylvania 今次大選郵寄選票官方數據（而家就見到），但出現咗2020年初選——注意係初選——嘅郵寄投票官方數據。最神奇嘅係，申請人數係1,823,148，同朱利亞尼提到個數字一模一樣。
注意唔係約數，朱利亞尼喺聽證會上兩次明確提到「1,823,148」呢個數字。好明顯，佢係用咗初選嘅申請數字同大選嘅點票數字比較，然後言之鑿鑿話 Pennsylvania 選舉舞弊。
講咗唔知幾多次，extraordinary claims require extraordinary evidence，你講嘅嘢越爆，越需要強大證據支持。
當一個人竟然可以喺公開場合犯下咁低級嘅錯誤，你應該衡量一下佢其他講法有幾可信（留意我唔係叫人即刻唔信，信念唔應該係all or nothing）。
到底邊個先係喺度散播 fake news？仲見到人話「證據係畀法庭唔係畀傳媒」，但呢單嘅證據上網就睇到，唔明點解仲要死撐。
係人都會中伏，俾人呃唔緊要，最緊要錯咗識得改。
資料來源就睇呢篇 fact check︰
【Fact check】賓州寄出180萬張選票但點算到250萬票？實際上是朱利亞尼看錯數字 - The News Lens 關鍵評論網
賓州寄出180萬張選票但點算到250萬票？實際上是朱利亞尼看錯數字。
TNL特稿
（原刊於Medium）
相關文章︰
查核「萬四死人票」筆記
誤導的「作者」及需要脈絡的數據。
cky
