讀書筆記：《為什麼我們會相信陰謀論？》

《為什麼我們會相信陰謀論？從心理學角度探討人類多疑的思維，潛意識裡的古怪、偏執、荒唐和瘋狂》
作者：Rob Brotherton，譯者：高子梅

之前行開森記見到買，當時只係諗住要睇下啲陰謀論嘢。話說早排有兩個場合講fact check嘢都提到下陰謀論，當時我諗嘅係遲下有疫苗會有反疫苗陰謀論——當然對新疫苗安全可以有合理嘅質疑，同反疫苗陰謀論係兩回事，我擔心嘅係後者蓋過前者，轉移咗視線——只係估唔到美國大選咁有影響力。

呢本個方向都幾好，作者應該認為陰謀論有好多特質其實係正常人都會有嘅思考傾向（有時候就係認知偏誤）。例如陰謀論傾向個敘事係弱者對極端邪惡，呢種英雄式故事其實一直都有，亦因為呢類故事吸引人先流傳到，背後都有啲心理因素影響。「弱勢英雄」同「邪惡敵人」兩者更加係相輔相成，我之前都講過，一個人信咗陰謀論，任何相反證據只會變成「對手比想像中強大」嘅鐵證，令自己更加堅信，不過無為意咁樣同時更顯得自己支持嘅一方弱勢（俾咁多人恰）以致更加同情。（呢點一講就好明顯。）