「擔心share」不如「小心share」
![「擔心share」不如「小心share」](/content/images/size/w960/2024/01/vlcsnap-2021-02-12-12h33m44s780.jpg)
近排見有人 share 返篇〈不同網址的內容農場,背後疑由同一集團操作〉,仲貼埋入面有列唔少網址張圖——其實重點唔係啲網址,嗰篇文其中一個發現就係內容農場會註冊好多網址做跳板(類似短網址服務咁,我估係避免 Facebook 減低觸及率),所以你背晒佢都作用不大。
![](https://kayue.xyz/content/images/2024/01/0-jmly6SGZ_qNMnmcQ.png)
只要睇得夠多內容農場,一望到啲 post 就會認得,就算唔認得,click 到入去睇都會知係內容農場。都唔講啲網站設計簡陋,其實如果你真係關心件事,想知清楚係咪真,睇完內容農場抄嘢,查下消息來源就會知佢哋抄嘢。
所以容我講得難聽少少,而家仍然有人經常貼內容農場文出嚟,一係就根本唔關心件事真假,一係就以為自己關心緊件事,但其實只係想任由自己擔心、驚、嬲等情緒散播出去。如果到而家都仲係咁易俾啲明顯要 manipulate 你情緒嘅圖文片帶動,真係唔該檢討下,你亂咁擔心 share 係咪會幫到件事?
當然呢個問題都不限內容農場,好多無根據又無講清楚件事嘅 Facebook 傳聞都係,例如831太子站個「韓寶生」唔係叫韓寶生,係我朋友個朋友,無被消失亦無俾人打死,而今個月都有個叫韓寶生嘅人被控非法集結同「管有攻擊性武器或適合作非法用途的工具」;又例如近排有人貼一批人嘅相出嚟,話佢哋俾警察送咗返大陸,而其中一個係我同事個朋友。
(2024年1月27日按︰831事件一周年,「韓寶生」受訪表明仍然生存,真名叫王茂俊,已經去咗英國尋求政治庇護;《眾新聞》喺2019年12月發佈訪問,受訪者當年11月18日從理大離開、影片顯示俾警方押送上東鐵,係傳聞「被送中」嘅被捕者。)
見過有人話香港資訊流通,質疑點解咁多人傳失蹤佢都睇唔到人澄清,其實咪就係因為個個都亂咁 share 失蹤資訊,少人理啲澄清囉,一放出嚟就好難收得返。更何況呢個時勢,走出嚟講又要驚俾人起底,又驚啲人陰謀論死都唔信,一個唔覺意屈埋你係黑警,咪仲麻煩。
嚟到呢度,又要推多次解釋點解嗰個「返送中自殺記錄」有問題,因為我見唔到其他人澄清,但就一直都有人傳︰
![](https://image1.thenewslens.com/2019/9/om659y84aql8izxzqjk7ezx5xwxjtj.png?fm=jpg&format=crop&h=630&q=70&w=1200)
![](https://kayue.xyz/content/images/2024/01/1-7tL5ZzuDHFd8hhnK4x30Qw-3.png)
我最嬲係乜?就係好多人根本一直都唔關心自殺議題,所以數到有咁多人自殺就覺得好多好恐怖——其實真係有好多人自殺(唔係話一定無被自殺個案,但如果根本唔知 baseline,又點判斷多定少呢?更何況數據本身出錯)。
最近香港民意研究所接手中大個調查顯示,對警隊信任程度方面,雖然仍然有過半人畀0分(50.4%,上次51.5%),但畀5至10分(滿分)嘅人明顯增加,畀1至4分嘅人就減少。
當然呢度係有兩極化趨向,早前堵路同大量衝突亦有可能令部分人傾向支持返警方。不過我都想提多一個可能解釋(肯定唔充分,亦流於猜想)︰而家呢個時勢,警隊同示威者嘅信譽係零和遊戲,同情示威者一方如果繼續大量推啲無根據嘅消息,只要有多幾個明顯出錯,俾警察攞嚟「澄清」,就會係幫緊警方得分——那怕只係選擇性澄清,迴避真正問題。我相信大家聽過《狼來了》呢個故事㗎啦。
保持資訊公德心,你我有責。
![](https://image1.thenewslens.com/2019/10/1lhkp1rjfspsoenzt1yq1vdbvq8u9n.jpg?fm=jpg&format=crop&h=630&q=70&w=1200)
(原刊於Medium)