讀書筆記：《為什麼這麼荒謬還有人信？》

《為什麼這麼荒謬還有人信？揭開你我選擇相信與拒絕相信的心理學》
作者：Hugo Mercier著，譯者：鍾沛君

作者認為人無想像中咁易呃，又認為「民眾就係易受煽動」等講法唔成立，例如廣告、政治宣傳其實無啲人講到咁有效。呢種立場睇落算係幾小眾，一開頭嘗試用演化角度解釋幾得意（類似一種evolutionary game），說明如果呃人真係咁容易，就會個個都去呃人，令到大家都唔去溝通（因為溝通只會俾人呃），所以欺騙同反欺騙嘅能力應該係共同演化。

如果對比平日見到嘅謠言傳播，呢個機制聽落好似好違反常識，後尾佢嘗試解釋返點解謠言會傳播咁廣，其實有部份例子唔係咁難想像，例如因為恐懼或者利益而扮相信，又或者只係需要rationalize某啲做法（而唔係相信謠言之後去做某啲事），如果同切身利益有關嘅話反而無咁易被騙。佢講人類無咁易呃，所以例如處理陰謀論時，應該要社會體制更可信先得，呢啲其實都好正路。

問題係，佢需要解釋所有謠言都係咁樣傳播，而唔係因為真係呃得到人。我認為作者忽略嘅位係，成個資訊生態運作無咁簡單，例如一旦形成咗某種印象、偏見，相關嘅謠言就更容易傳播，唔同謠言之間都可以有一定連結，某套說法咁啱多咗人信，相關內容就更容易多人信（當然都會有人離開，所以都要睇傳播同康復數字差幾多）。謠言同行為之間都唔係單向rationalize咁簡單，可以係個feedback loop不斷reinforce某種講法。