無論FB定MeWe，用社交媒體都要有良好資訊習慣
最近好多人開MeWe，就算唔係想由Facebook轉會都開定多個account先咁。FB當然有好多問題，啲人嘅不滿應該有唔少都係近年累積落嚟（就算淨係講UX問題，新desktop版根本唔想人用咁），但其實我都對部分人轉會嘅原因有保留，至少覺得要搞清楚自己想要乜先，如果有錯誤期望，去到邊個平台都唔會改變問題——除非只係想自己爽。
注意以下唔係批評MeWe（我未研究呢個平台），亦唔係幫FB講說話，係希望大家喺吸收同傳播資訊方面培養良好習慣（假如未有），先至可以令平台嘅壞影響降至最低（咁當然都唔可以忽略平台本身嘅問題），所以呢度唔會講私隱、安全等問題，有興趣可以去聽下鍵盤戰線個直播再決定（利申未聽）。
一，唔好淨係靠社交媒體吸收資訊
MeWe其中一個賣點係無Newsfeed演算法（嚴格嚟講係佢個algorithm只係按時序，明就得啦）、無廣告，好似係按時序顯示內容。Newsfeed演算法係令Facebook廣告咁好搵（可以精準知道一個人想睇乜）亦係引起最大爭議嘅原因，除咗私隱問題外，亦有其他問題例如Newsfeed演算法造成嘅迴音室效應、政治人物可以按用戶喜好投放廣告 — — 可以對你講A對另一個人講B，而你哋都唔知對方收到咩訊息（而家可以睇到啲廣告，但一般人淨係睇Newsfeed未必發現到）等。其中一個幾核心問題係演算法唔透明，令用戶唔知FB有無刻意控制你睇到啲乜，同埋點解ban某啲內容，無論啲決定係咪合理，唔透明就好難獲得用戶信任。
話說回來，其實FB都仲可以畀人按時序咁睇post的，當然，以前仲有得畀你揀（我成日轉，隔一陣又俾FB轉返），而家就要專登去搵個「Most Recent」嚟睇，淨係咁都已經令好多人唔會用嚟睇，所以如果你想按時序睇嘢，都係MeWe好啲。不過係咪按返時序就好啲呢？咁又未必，至少我而家已經好少用呢個功能，其實內容一多，跟時序畀你睇未必真係睇到重要嘅嘢。如果演算法知我對乜有興趣，的確可以慳唔少時間睇少啲垃圾，FB個問題係咁啱呢樣嘢符合FB利益（想你留耐啲爭取注意力）而且佢控制到我控制唔到（所以同我利益有衝突時唔會幫我，同埋我唔知）咁解。
除咗社交媒體外，其實仲有好多方法吸收資訊，例如上多啲唔同新聞網站、用下RSS Reader睇下啲blog咁（少咗人寫但仲有），又或者睇Medium（不過都少咗人用）同Patreon。至於點樣會大啲誘因？你畀下錢就有誘因㗎啦。不過就算唔畀錢，其實都仲有好多網站免費有嘢睇（YouTube都有好多知識型頻道，唔係下下都睇啲吹水陰謀論KOL嘅），最緊要係你有個習慣唔係咩都喺社交媒體上等人餵畀你。
喺度順手推介下Blendle，有啲大媒體訂閱好貴，我又唔覺得自己會睇得晒，就用呢個逐篇收錢嘅app去睇，每篇講緊幾毫子美金，即係幾蚊港弊，都係排隊等巴士等𨋢嗰陣睇。（2024年按︰Blendle個實驗似乎已經失敗。）
另外，而家我個Newsfeed每日都有大量高質內容睇唔切（好多年前我真係可以睇晒所有post，你話幾恐怖，不過嗰陣無咁多內容就真），網絡就係咁，幾萬樣嘢唔好期望自己睇得晒，要識分時間去睇唔同內容，唔係下下就變咗淨係睇最易吸收嘅短片同meme（唔係話呢啲唔好，唔好偏食咁解）。
呢啲情況，都可以試下用Pocket之類嘅app，遇到長文無時間睇就save低佢，又係排隊等巴士等𨋢嗰陣，按時間按長度睇返一兩篇文。
二，保持資訊環境清潔
無論個平台有無演算法或者個演算法幾好幾透明，如果淨係得一堆垃圾同假消息，咁結果都只係會睇到垃圾同假消息。所以大家喺消費（接收資訊）同生產（自己寫或轉發）都應該盡量做好，保持資訊環境清潔人人有責。
網絡上流料傳播往往快好多，之後啲澄清fact check通常無乜人睇到。如果你唔小心share錯流料，唔該盡力更正返，而唔係扮無嘢就算數。最起碼，都要出返個post澄清、改返錯嘅舊post，如果有朋友受你誤導而分享錯誤消息（睇下你個post有咩人分享就知啦），你都有責任幫手同佢講返。
咁樣補鑊當然唔太理想，最好應該謹慎啲，見到啲post個樣好流就唔好share咗先算。講真，一啲post無資料來源但又好大件事咁，你都應該查清楚先好傳啦，但人類總要犯同樣錯誤，唉。
另外我建議大家喺share嘢方面「小器」一啲，意思係，如果有啲page經常share流料，一次半次都可能係唔小心犯錯，但成日係咁，你就唔應該再幫呢啲人宣傳——那怕個post內容無乜特別，你每個share都係幫佢賺reach賺engagement。
仲有就係偷相偷片偷新聞，有啲page最叻就係抄啲內容出嚟，然後大家就淨係share個post，無人睇返原本條新聞，結果咪又係呢啲page賺影響力。唔想鼓勵緊人做啲對成個資訊生態無好處嘅事，就要好好咁諗清楚你share乜嘢。（講開又講，上年咁多人鬧「金水」，今年好多page有過之而無不及，又無事喎。）
當然啦，講咗咁多，如果你覺得唔鍾意嘅都係假新聞，全世界一齊嚟呃你但網絡上唔知邊度嚟嘅消息可靠，我幫你唔到，無人幫到你。
（原刊於Medium）
