讀書筆記︰《假新聞：來源、樣態與因應策略》
《假新聞：來源、樣態與因應策略》
汪志堅、陳才著
呢本都幾差下，兩個作者都係教授，但本書又唔係學術嘢，面向大眾嚟講都唔吸引，內容仲要出出地事。
因為都唔推介睇，所以揀幾個point寫就算，費事用太多時間。
1. 啲定義同圖好奇怪。例如第三章「假新聞的樣態」，圖1「廣義與狹義的假新聞」入面，X軸係欺騙程度、Y軸係事實程度（得一個象限），然後放各類內容落去。「新聞捏造」、「新聞操作」、「原生廣告」、「宣傳、置入」、「真新聞」按順序由左下（低事實、高欺騙）至右上（高事實、低欺騙），要去到最右方（欺騙程度低）先有三款內容，事實程度由高至低分別係「真新聞」、「嘲諷」同「戲謔模仿」——即係除咗最後呢兩個之外，事實程度同欺騙程度僅僅呈反比。
當然點分類都一定會簡化同不足，但稍為了解失實資訊嘅複雜都會知道唔會簡單成咁（例如片面呈現事實都可以呃到人），而且好多內容本身就要睇context同受眾，無客觀嘅「事實程度」同「欺騙程度」可言（只要對得準受眾，特別係了解佢哋嘅信念同認知，要散播misinfo一句大話都唔使講已經可以達到目的）。
又例如第三章圖2「錯誤訊息與虛假訊息」，其實只係講misinfo同disinfo嘅分別（前者無意圖後者有），佢硬係要畫張圖係兩個唔相交（僅僅掂住）嘅大橢圓，左邊係「事實︰正確的消息」，右邊係「非事實︰不正確的消息」，而右邊嗰個入面又有兩個細橢圓「錯誤訊息︰無意地散播了非事實」同「虛假訊息︰有意地傳播了非事實」，但呢兩個橢圓又係無相交。
先唔講將misinfo同disinfo放落「非事實」本身就可疑（而「非事實」其實唔只「不正確的消息」，無真假可言嘅都係但唔扯太遠），最大問題係唔知佢畫張圖做乜。
然後第三章圖3（最後一個例子）「假新聞與網絡謠言」成個domain係「消息」，當中一個長方形係「新聞（網路媒體或傳統媒體的報導）」，右下有一格仔係「假新聞」，連住「新聞」以外另一格係「假消息（謠言）」。最後一個定義都幾奇怪下，同埋又係唔知點解要整張圖。
仲有好多類似奇怪嘅二分同圖表，不過係咁多先。
