未睇嘅書
手痕開咗個IG講下買咗未睇嘅書，話要寫短啲但唔小心第一個post就寫長咗，貼埋出嚟。
開個IG講下啲買咗未睇（注意唔係「唔睇」）嘅書，其實係因為呢幾個月太忙無乜點睇書，想迫自己睇返多啲，亦控制下啲購物欲。近年通常睇完會寫下筆記，但往往都要返咁上下心機時間，寫啲未睇嘅書就唔會太花時間，因為未睇無咁多嘢講，同埋寫咁長不如真係走去睇書。
啲書買咗未睇嘅理由好簡單，就係無時間。但點解明知未有時間睇都買呢？我諗過下，主要原因有幾個︰
- 覺得要支持下（通常係香港作者）
- 工作需要，買定先，用到時唔使搵
- 見到罕見或者難得咁平嘅好書（通常係二手）
- 驚如果而家唔買之後無機會再買
講起買咗未睇嘅書，通常都會提到《黑天鵝》（我無睇過）所提到嘅「反圖書館」（antilibrary）。作者Nassim Nicholas Taleb話Umberto Eco將去佢私人圖書館嘅訪客分為兩類︰一類讚個圖書館好大、問佢睇咗幾多，另一類就知道私人圖書館唔係用嚟曬命而係研究工具，Taleb就叫啲嗰堆未睇嘅書「反圖書館」。
想引Taleb呢個講法時本人職業病發作，搵下到底Eco邊度講過，查咗《黑天鵝》無提到出處，最後bibliography列咗四本Eco著作，對返內容應該係出自《How to Travel with a Salmon & Other Essays》入面篇〈How to Justify a Private Library〉。
不過Eco喺呢篇文入面無提到兩類訪客，只係話經常遇到人見到佢藏書就話︰「嘩好多書！你係咪睇晒？」佢一開頭以為只有唔多見開書嘅人先會咁問（仲笑啲人 “accustomed to seeing a couple of shelves with five paperback mysteries and a children’s encyclopedia”），但發現其他人都咁講，佢認為呢啲人視書櫃只係用嚟存放睇過嘅書，而唔認為圖書館係工具。
至於睇書呢家嘢，細個都算係鍾意睇書，少不免追求閱讀量，大個自然知同真係有天才或狠勁嘅人比不值一睇，往後見到有啲人刻意塑造睇好多書嘅才子形象，都會忍唔住笑（唔應該咁，因為自己一唔小心都可能會係咁）。我最鍾意都係友人郭梓祺用食橙比喻︰
說看書有助擴闊眼界和想像，認識人和自己在世界的位置，當然對，但盲目吹噓閱讀多好，對根本沒空或與書無緣的人而言，也可以是奢侈又離身的事，只徒添憎厭或自卑。有時不小心這樣壓了人，想起就覺得不應該。
然則『世界閱讀日』又有何意義呢？退一萬步想，閱讀說不定像吃橙，好味、便宜、有益，喜歡吃橙的人都知道，但世上就是有人不吃橙。都是緣分。（郭梓祺〈世界閱讀日﹕少時與此獨無緣〉）
講返「反圖書館」呢個詞，如果用嚟代表「未睇過嘅藏書」，即係話「圖書館」係代表「睇過嘅藏書」，反而同Eco提出嘅諗法——圖書館唔只係擺啲睇咗嘅書，更係研究工具——背道而馳。況且書呢家嘢同戲一樣，邊個話睇一次就夠？就咁用「睇過／未睇過」嚟分，未免略為粗疏。
