其實陳裕匡有無氯痤瘡？
呢幾個月大量記者喺示威前線直播，催淚彈食唔少，而警方引入中國製催淚彈後，現場所見催淚彈明顯高溫咗，令人擔心有更多有害物質，所以當《立場新聞》記者陳裕匡喺11月出post話「醫生証實我長岀了氯痤瘡」時，引起極大迴響。
佢喺出post之後一日補充返話個醫生係「一位診斷了很多現場記者與示威者的中醫師」，而嗰位中醫師強調「氯痤瘡相關的症狀有解救之法」，就令成件事可信程度大打折扣，唔係話佢講大話，但至少未去到叫「確診」（所以將一篇經我手編輯嘅文由「確診」改為「疑患」）。
必須強調，無論佢有無患上氯痤瘡，警察近半年發射催淚彈嘅手法一樣大有問題，亦肯定對現場示威者、途人、急救員同記者有其他健康影響（有團隊做緊相關研究）。警察唔單只毫無紀律咁射催淚，更騎劫埋成個政府，例如食物及衛生局局長陳肇始引述話影響行動部署唔畀成份都得，離晒譜，亦完全無回應過民間嘅質疑同擔憂（唔好賴咩假新聞啦，公開透明先解決到㗎）。
但我之所以提出質疑，係因為早幾日見到《明周》篇訪問（12月27號出街），陳裕匡提到當初「證實」患氯痤瘡個情況係咁︰
其後，他告知醫師，自己的皮膚出現問題。醫師揪起上衣，看了看，摸一摸，表示部分接觸過催淚彈的記者和前線抗爭者也有相類徵狀：看似是西醫所說的氯痤瘡。
唔知係咪簡化咗啦，至少呢種睇法，同做活體組織切片確診係兩回事嚟，但陳裕匡似乎未有去做進一步檢查︰
氯痤瘡的相關報道，引起部分西醫關注。從西醫角度來說，氯痤瘡是人體積存高濃度二噁英的唯一可確認表徵，不少西醫主動提出替陳裕匡進行身體檢查和診治，「我感謝他們，但是始終對於承受別人的恩惠不太自在，有空我會多看一兩個西醫。」他說，因為中醫和西醫是兩種迥然不同的醫學方式，當中關乎病人的個人選擇，對身體抱持怎樣的想法，正如他目前仍會繼續跑到前線做直播，如常地吃催淚彈一樣。
其實佢一個月前已經話「尋求西醫的斷[症]」，咁我估個訪問都唔會係太耐之前做，即係成個月都未去睇醫生驗返清楚——雖然佢話「有空」會睇，而我都好明白呢行嘅「有空」可能會拖好耐，但係呢個真係唔係個人選擇問題，亦唔係受唔受恩惠嘅問題，「有無氯痤瘡」係事實問題，而萬一不幸有（希望無），呢個事實對於好多人而言非常重要。
而篇訪問之後有搵同幫佢睇嘅中醫師，提到「陳裕匡的咳嗽問題，在看診一次後已經痊癒。而皮膚問題，看診三次，兩至四星期後他的紅瘡便慢慢消散」，就咁睇嚟，呢啲紅瘡應該唔係據稱難以治療嘅氯痤瘡，但係篇訪問本身都無講清楚呢個紅瘡係咪一開頭嘅疑似氯痤瘡（睇落似係）。
當然，另一個可能係呢位中醫師發現到治療氯痤瘡嘅方法，但如果本來就未能確定佢患嘅係氯痤瘡，就無辦法進一步做到研究判斷。
政府唔肯公開成份，唔肯畀人驗下催淚彈射出嚟會產生乜物質，民間只能夠盡做，用唔同方法搵出催淚彈放題有咩影響。如果有任何經常接觸催淚彈嘅人出現疑似氯痤瘡症狀，都應該盡快去檢查下，無就最好，萬一唔好彩有，起碼可以了解下點處理，同埋協助研究，等大家知多啲。
Anyway，希望陳裕匡以及所有記者（同急救員示威者途人）都健健康康，免受警暴傷害。
同場加映《明周》訪問許樹昌醫生︰
最後推返公共衞生研究社相關文章︰
公共衞生研究社
（原刊於Medium）
